Babasan

COPAS ti Status Fauzi Salaka

Ungkara basa nu geus matok make harti injeuman.

Biasana dina wangun kecap kantetan. 

• Diangeun careuhkeun: Diantep teu didahar atawa dipirosea

• Ieu aing: Boga rasa pangpunjulna, panggagahna, pangbeungharna

• Asak warah: Cukup latihan (didikan). Cirina: henteu dusun, basa jeung paripolahna euweuh nu salah

• Babalik Pikir: Robah lampah jadi hade

• Cacag nangkaeun: Henteu beres, henteu rata

• Carang takol: Saeutik nyaritana, anu diomongkeun teh anu perluna bae

• Elmu ajug: Jalma nu bisa mapatahan kahadean ka batur, tapi manehna sorangan teu ngajalankeun papatahna

• Elok bangkong: Nuju sakarat ngan kari tunggu dawuh bae, keur ngaleupaskeun nyawa

• Ganti pileumpangan: Ganti adat anu tadina hade jadi goreng atawa sabalikna

• Harigu manukeun: Dada jelema nu nonjol ka hareup siga harigu manuk

• Aya buntutna: Aya terusna tina perkara nu nguciwakeun

• Hirup ngabangbara: Ari tempat pikeun matuh mah leutik tur teu tumaninah, tapi lamun kaluar ti imah ginding teu eleh ku batur

• Nyoo gado: Ngaheureuyan jelema anu pantesna dihormat

• Teu didingding kelir: Diceplakkeun satarabasna taya nu dipinding-pinding

• Elmu sapi: Samiuk dina kagorengan

• Malapah gedang: Malibir henteu jol pok ka nu dipimaksud

• Haseum budi: Leuwih mindeng baeud jeung camberut batan seuri

• Ieu aing: Boga rasa pangpunjulna, panggagahna, pangbeungharna

• Jejer pasar: Lumrah bae, mun ngeunaan lalaki kasep henteu goreng henteu, mun ngeunaan awewe geulis henteu goreng oge henteu

• Ngembang cengek: Mencenges, nenggang ti nu sejen atawa anu panggeulisna

• Teu diambeuan: Teu dipikaserab, teu dipikasieun

• Kumis bangbara ngaliang: Kumis anu nyeseg kana liang irung

• Kawas bayah kuda: Dilarapkeun kana papakean anu warnana geus belel pisan

• Cara embe: Embung mandi sabab sieun ku cai

• Ngadeupaan lincar: Kukurilingan deukeut imah nu keur hajat ngarah diondang

• Ngarangkaskeun dungus: Ari hayang jeung bogohna mah ti bareto, ti keur ngora keneh, ngan kaselang heula ku kawin ka nu sejen. Kakolotnakeun kakara diparengkeun ngajodo

• Gancang pincang: Pagawean nu gancang anggeus tapi hasilna goreng

• Gantung denge: Ngarasa hanjakal henteu terus bisa ngadengekeun, caritana kaburu anggeus

• Handap asor: Daek ngahormat ka batur

Rebo, 4/4/2012

Rmb Martadi Kusumah